¹Kwa mwimbishaji. Zaburi ya Daudi. Mpaka lini, Ee Bwana? Je, utanisahau milele? Utanificha uso wako mpaka lini?

²Nitapambana na mawazo yangu mpaka lini, na kila siku kuwa na majonzi moyoni mwangu? Adui zangu watanishinda mpaka lini?

³Nitazame, unijibu, Ee Bwana Mungu wangu. Yatie nuru macho yangu, ama sivyo nitalala usingizi wa mauti.

⁴Adui yangu atasema, “Nimemshinda,” nao adui zangu watashangilia nitakapoanguka.

⁵Lakini ninategemea upendo wako usiokoma; moyo wangu unashangilia katika wokovu wako.

⁶Nitamwimbia Bwana, kwa kuwa amekuwa mwema kwangu.